Friday, December 10, 2010

ആവര്‍ത്തനപ്പട്ടിക ; അതിശയങ്ങളുടെ താക്കോല്‍ !


ആവര്‍ത്തനപ്പട്ടിക (ഇവിടെ ക്ലിക്ക് ചെയ്യുക) യില്‍ നിന്ന് ധാരാളം കാര്യങ്ങള്‍ പഠിക്കാനുണ്ട് . ഞാന്‍ വസ്തുതകള്‍ ജനറലായി പറഞ്ഞു പോവുകയാണ് ചെയ്യുക . കൂടുതല്‍ മനസ്സിലാക്കാന്‍ താല്പര്യമുള്ളവര്‍ ഇവിടെ കൊടുത്തിരിക്കുന്ന ലിങ്കുകളില്‍ നിന്നോ ലഭ്യമായ മറ്റു മാര്‍ഗ്ഗങ്ങളില്‍ കൂടിയോ കാര്യങ്ങള്‍ ഗ്രഹിക്കേണ്ടതുണ്ട് . നമ്മള്‍ നിത്യജീവിതത്തില്‍ പല കാര്യങ്ങളെക്കുറിച്ചും സംസാരിക്കുന്നു, മനസ്സിലാക്കാന്‍ ശ്രമിക്കുന്നു. എന്നാല്‍ അത്ഭുതങ്ങളുടെ കലവറയായ പ്രകൃതിയെക്കുറിച്ചും അവിടെ നടക്കുന്ന രാസ-ഭൌതിക പ്രവര്‍ത്തനങ്ങളെക്കുറിച്ചും മനസ്സിലാക്കാനും നാം ശ്രമിക്കേണ്ടതുണ്ട് . നമ്മുടെ ശരീരം വളരെ സങ്കീര്‍ണ്ണമായ ഒരു യന്ത്രം പോലെയാണ് . അത് എങ്ങിനെ പ്രവര്‍ത്തിക്കുന്നു എന്ന് നമ്മള്‍ മനസ്സിലാക്കണ്ടെ ? ഒരു വസ്തുവിനെ നമ്മള്‍ എങ്ങിനെ കാണുന്നു ? അത് തന്നെ ഒരു അത്ഭുതകരമായ പ്രവര്‍ത്തനമാണ് . അങ്ങിനെ നോക്കുമ്പോള്‍ നമ്മുടെ ചുറ്റുപാടുകള്‍ അത്യന്തം അതിശയകരണ് . ഇതിനെപ്പറ്റിയെല്ലാം നമുക്ക് ഒരു ജിജ്ഞാസ തോന്നേണ്ടതാണ് . സയന്‍സ് പഠിക്കുമ്പോള്‍ നമ്മുടെ അകക്കണ്ണ് തുറക്കുന്നു ; എല്ലാറ്റിനേയും കുറിച്ചു ഒരു ഉള്‍ക്കാഴ്ച ലഭിക്കുന്നു. ഒരു ഭാഷയൊ , സാഹിത്യമോ പഠിക്കണമെങ്കില്‍ അദ്യം അതിലെ അക്ഷരമാല പഠിക്കണം . അതേപോലെ സയന്‍സ് പഠിക്കണമെങ്കില്‍ ആദ്യം ആറ്റങ്ങളെ കുറിച്ചു പഠിക്കണം . പ്രപഞ്ചം എന്ന മഹാഗ്രന്ഥത്തിന്റെ അക്ഷരമാലയാണ് ആറ്റങ്ങള്‍

ഇവിടെ   ക്ലിക്ക് ചെയ്താല്‍ ക്രിപ്ടണ്‍ എന്ന മൂലകത്തെ പറ്റി വിവരിച്ചിരിക്കുന്നത് കാണാം . 36-മത്തെ മൂലകമാണ് ക്രിപ്ടണ്‍ . Kr എന്നത് അതിന്റെ പ്രതീകവും (symbol) , 83.80 എന്നത് അതിന്റെ അണുഭാരവുമാണ് . ഏതൊരു അണുവിനും ഭാരമുണ്ടല്ലോ . അണുവിന്റെ ഭാരം എന്നത് അതില്‍ അടങ്ങിയിട്ടുള്ള ദ്രവ്യ (mass) ത്തിന്റെ അളവാണ് . പൊതുവായി പറഞ്ഞാല്‍ അണുവിന്റെ ന്യൂക്ലിയസ്സിലുള്ള ന്യുട്രോണിന്റെയും,പ്രോട്ടോണിന്റെയും ആകെത്തുകയാണ് അണുവിന്റെ ഭാരം എന്നത് . ഇലക്ട്രോണിന്റെ ഭാരം വളരെ നിസ്സരമാകയാല്‍ നമുക്കത് അവഗണിക്കാം . carbon-12 നെ അടിസ്ഥാനപ്പെടുത്തിയാണ് അണുഭാരം ശാസ്ത്രീയമായി നിര്‍ണ്ണയിക്കുന്നത് . നമ്മള്‍ തല്‍ക്കാലം അങ്ങോട്ട് കടക്കേണ്ട . അപ്പോള്‍ ക്രിപ്ടണ്‍ എന്ന അണുവിന്റെ ഭാരം 83.80 എന്നത് റൌണ്ട് ചെയ്ത് 84 ആക്കിയാല്‍ അതിന്റെ കേന്ദ്രത്തില്‍ 36 പ്രോട്ടോണുകളും 48 ന്യൂട്രോണുകളും ഉണ്ടെന്ന് മനസ്സിലാക്കാം . 

ഒരേ ഇനത്തില്‍ തന്നെയുള്ള ആറ്റങ്ങളില്‍ ചിലതിന്റെ ന്യൂക്ലിയസ്സില്‍ ന്യൂട്രോണുകളുടെ എണ്ണം അധികമായിരിക്കും . അത്തരം ആറ്റങ്ങളെ ആ അണുവിന്റെ തന്നെ ഐസൊടോപ്പ് (isotope) എന്ന് പറയുന്നു. ഉദഹരണത്തിന് ഹൈഡ്രജന്‍ ആറ്റത്തിന്റെ ന്യൂക്ലിയസ്സില്‍ ഒരു പ്രോട്ടോണ്‍ മാത്രമേയുള്ളൂ . ന്യൂട്രോണ്‍ ഇല്ല . എന്നാല്‍ ചില ഹൈഡ്രജന്‍ ആറ്റത്തില്‍ ഒരു ന്യൂട്രോണും മറ്റുചിലതില്‍ രണ്ട് ന്യൂട്രോണുകളും കാണാം . ഇവയെ ഹൈഡ്രജന്റെ ഐസോടോപ്പുകള്‍ എന്നു പറയുന്നു. മിക്കവാറും എല്ലാ മൂലകങ്ങള്‍ക്കും ഒന്നില്‍ കൂടുതല്‍ ഐസോടോപ്പുകള്‍ ഉണ്ടെന്ന് പറയാം . 
ഐസോടോപ്പുകള്‍ക്ക് വളരെയധികം പ്രാധാന്യമുണ്ട്. ഹൈഡ്രജന്റെ ന്യൂക്ലിയസ്സില്‍ ഒരു ന്യൂട്രോണ്‍ ഉള്ള ഐസോടോപ്പിനെ ഡ്യൂറ്റീരിയം (Deuterium) എന്നും, രണ്ട് ന്യൂട്രോണുകള്‍ ഉള്ളതിനെ ട്രീഷ്യം എന്നും (Tritium) പറയുന്നു. വെള്ളം അഥവാ ജലം രണ്ട് ഹൈഡ്രജന്‍ ആറ്റവും ഒരു ഓക്സിജന്‍ ആറ്റവും സംയോജിച്ചുണ്ടായ (H2O) പദാര്‍ത്ഥമാണെന്നറിയാമല്ലോ . ഭൂമിയിലുള്ള മിക്കവാറും മുഴുവന്‍ ജലവും ഉണ്ടായിട്ടുള്ളത് സാധാരണ ഹൈഡ്രജന്‍ ആറ്റം ഓക്സിജനുമായി സംയോജിച്ചിട്ടാണ് . എന്നാല്‍ ഹൈഡ്രജന്റെ ഐസോടോപ്പുകളായ ഡ്യൂറ്റീരിയം , ട്രീഷ്യം എന്നിവ ഓക്സിജനുമായി സംയോജിച്ചുണ്ടായ ജലവുമുണ്ട് . അതിനെ ഘനജലം (heavy water) എന്നു പറയുന്നു. ഘനജലത്തിന് വമ്പിച്ച വ്യാവസായികപ്രാധാന്യമുണ്ട് . ആണവ റിയാക്ടറുകളുടെ പ്രവര്‍ത്തനത്തിന് ഘനജലം വേണം . അതേപ്പറ്റി പിന്നീട് വിസ്തരിക്കാം .

ആറ്റങ്ങളെ കുറിച്ചു പഠിക്കുമ്പോള്‍ ഐസോടോപ്പുകളെ പോലെ പ്രാധാന്യമുള്ള മറ്റൊന്നാണ് അയണുകള്‍ (ion). സാധാരണയായി ഒരു ആറ്റത്തില്‍ നിന്ന് ഒരു ഇലക്ട്രോണ്‍ നഷ്ടപ്പെടുകയോ അല്ലെങ്കില്‍, ഒരു ഇലക്ട്രോണ്‍ ആറ്റത്തില്‍ വന്നു ചേരുകയോ ചെയ്യുമ്പോള്‍ ആ ആറ്റത്തെ അതിന്റെ അയണ്‍ എന്നു പറയുന്നു. അയണുകള്‍ക്ക് ഏറ്റവും നല്ല ഉദാഹരണമാണ് സോഡിയവും ക്ലോറിനും .

പതിനൊന്നാമത്തെ മൂലകമാണ് സോഡിയം (sodium) . സോഡിയത്തിന്റെ ന്യൂക്ലിയസ്സില്‍ 11 പ്രോട്ടോണുകളും 11 ന്യൂട്രോണുകളും , k . l . m എന്നീ ഷെല്ലുകളിലായി 11 ഇലക്ട്രോണുകളുമാണുള്ളത് . ഇതില്‍ 2 ഇലക്ട്രോണ്‍ കൊണ്ട് ആദ്യത്തെ k ഷെല്ലും 8 ഇലക്ട്രോണ്‍ കൊണ്ട് രണ്ടാമത്തെ l ഷെല്ലും പൂര്‍ത്തിയായി . മൂന്നാമത്തെ ഷെല്‍ ആയ m പൂര്‍ത്തിയാകണമെങ്കില്‍ 8 ഇലക്ട്രോണ്‍വേണമായിരുന്നു. എന്നാല്‍ ഒരു ഇലക്ട്രോണ്‍ മാത്രമേ ബാക്കിയുള്ളൂ . ആ ഷെല്‍ പൂര്‍ത്തിയാക്കാന്‍ ആവശ്യമായ 7 ഇലക്ട്രോണുകളെ സംഘടിപ്പിക്കുക അത്ര എളുപ്പമല്ല . അതുകൊണ്ട് മൂന്നാമത്തെ ഷെല്ലിലെ ഒരു ഇലക്ട്രോണിനെ സോഡിയം ഉപേക്ഷിക്കുന്നു . അപ്പോള്‍ സോഡിയം 11 പ്രോട്ടോണുകളും 10 ഇലക്ട്രോണുകളുമുള്ള ഒരു അയണ്‍ ആയി മാറുന്നു. കാരണം അതില്‍ ഇപ്പോള്‍ പോസിറ്റീവ് ചാര്‍ജ്ജുള്ള ഒരു പ്രോട്ടോണ്‍ കൂടുതലാണ് . ഇങ്ങിനെ പോസിറ്റീവ് ആയ അയണിനെ കാറ്റിയോണ്‍ (cation (cat-eye-on) ) എന്നു പറയുന്നു . പോസിറ്റീവ് അയണുകളെ കാത്തോഡ് (cathode) ആകര്‍ഷിക്കുന്നത് കൊണ്ടാണ് ഈ പേര്‍ വരാന്‍ കാരണം . 
ഇനി ക്ലോറിന്റ കാര്യമെടുക്കാം . 17-മത്തെ മൂലകമാണ് ക്ലോറിന്‍ (chlorine ) . സോഡിയത്തിന്റെ കാര്യത്തില്‍ മൂന്നാമത്തെ ഷെല്ലില്‍ ഒരു ഇലക്ട്രോണ്‍ മാത്രമാണ് ഉണ്ടായിരുന്നതെങ്കില്‍ ക്ലോറിന്റെ മൂന്നാം ഷെല്ലില്‍ 7 എണ്ണമുണ്ട് . ഈ ഏഴ് ഇലക്ട്രോണുകളെയും അപ്പാടെ ഉപേക്ഷിക്കാന്‍ ക്ലോറിന് മനസ്സില്ല. അതുകൊണ്ട് മൂന്നാമത്തെ ഷെല്‍ പുര്‍ത്തിയാക്കാന്‍ ക്ലോറിന്‍ ഒരു ഇലക്ട്രോണിനെ സ്വീകരിക്കുന്നു. അങ്ങിനെ ക്ലോറിന്‍ ഒരു നെഗറ്റീവ് അയണ്‍ ആയി മാറുന്നു. കാരണം ഇപ്പോള്‍ അതില്‍ 17 പ്രോട്ടോണുകളും 18 ഇലക്ട്രോണുകളുമാണുകളുമാണുള്ളത് . ഇങ്ങിനെ നെഗറ്റീവ് ആയ അയണുകളെ ആനൈയോണ്‍ ( Anion (an-eye-on) ) എന്നു പറയുന്നു . നെഗറ്റീവ് അയണുകളെ ആനോഡ് (anode) ആകര്‍ഷിക്കുന്നത് കൊണ്ടാണ് ഈ പേര്‍ വരാന്‍ കാരണം .

ഇങ്ങിനെ പോസിറ്റീവ് അയണ്‍ ആയ സോഡിയവും, നെഗറ്റീവ് അയണ്‍ ആയ ക്ലോറിനും കൂടിച്ചേര്‍ന്നുണ്ടായ സംയുക്തമാണ് (compound) നാം നിത്യവും ഉപയോഗിക്കുന്ന കറിയുപ്പ് അഥവാ സോഡിയംക്ലോറൈഡ് (NaCl) . ഉപ്പിന് ജൈവശാസ്ത്രപരമായും , വ്യാവസായികമായും വമ്പിച്ച പ്രാധാന്യമാണുള്ളത് . എവിടെ നിന്നാണ് നമുക്ക് കറിയുപ്പ് ലഭിക്കുന്നത് ? പണ്ടൊക്കെ കടല്‍ജലം വറ്റിച്ച് ഉപ്പ് കുറുക്കിയെടുക്കുകയായിരുന്നു പതിവ് . ഇന്ന് അത് പ്രായോഗികമല്ല . അത്കൊണ്ട് ഉപ്പു പാറകളില്‍ (Rock salt ) നിന്ന് വ്യാവസായികാടിസ്ഥാനത്തില്‍ ഉപ്പ് ഖനനം ചെയ്ത് വിപണനം ചെയ്യപ്പെടുകയാണ് ഇന്ന് . ഇങ്ങിനെ ഉണ്ടാക്കുന്ന ഉപ്പുകളില്‍ അയഡിന്‍ ചേര്‍ക്കണമെന്ന് ഗവണ്മെന്റ് നിയമം മൂലം നിര്‍ബ്ബന്ധമാക്കിയിട്ടുണ്ട് . കടല്‍ജലത്തില്‍ അയഡിന്‍ ഉണ്ടായിരുന്നത് കൊണ്ട് , കടല്‍ജലം വറ്റിച്ചുണ്ടാക്കുന്ന ഉപ്പിലും അയഡിന്‍ ഉണ്ടായിരുന്നു. എന്നാല്‍ ഉപ്പുപാറകളില്‍ അയഡിന്‍ ഇല്ല . അയഡിന്‍ നമ്മുടെ ശരീരത്തിന് വളരെ അത്യന്താപേക്ഷിതമായ ഒരു മൂലകമാണ് . അയഡിന്റെ അഭാവം മൂലമാണ് ഗോയിറ്റര്‍ (തൊണ്ടവീക്കം ) എന്ന അസുഖം ഉണ്ടാവുന്നത് .

(തുടരും)

20 comments:

chithrakaran ചിത്രകാരന്‍ said...

എന്റെ പ്രിയപ്പെട്ട സുകുമാരേട്ടാ....
ഇത്രയും ലളിതമായി ശാസ്ത്രം പറഞ്ഞു തരാനറിയുന്ന താങ്കള്‍ ബൂലോകത്തിന്റെ ഭാഗ്യമാണെന്ന് മുഖസ്തുതിയല്ലാതെ.... സത്യമായിത്തന്നെ ചിത്രകാരന്‍ അഭിപ്രായപ്പെടുന്നു !!
ഇടവിടാതെ എഴുതണമെന്ന് സ്നേഹപൂര്‍വ്വം അഭ്യര്‍ത്ഥിക്കുന്നു.
ചിത്രകാരന് ഏറ്റവും ഇഷ്ടപ്പെട്ട വിഷയമാണ് താങ്കള്‍ ആദ്യ പൊസ്റ്റിനു വിഷയമാക്കിയിരിക്കുന്നത്.
മറവിയില്‍ ഉപേക്ഷിച്ച ശാസ്ത്രത്തേ ചിത്രകാരന്‍ ഒന്നു മാറോടുചേര്‍ത്ത് പരിലാളിക്കട്ടെ !!!
:)...:))))))

chithrakaran ചിത്രകാരന്‍ said...

ആവര്‍ത്തനപ്പട്ടികയിലെ ആറ്റങ്ങള്‍ പ്രപഞ്ചത്തിന്റെ അക്ഷരമാലയാണെന്ന താങ്കളുടെ കണ്ടെത്തലിന് ചിത്രകാരന്റെ പ്രണാമം....
എത്ര മനോഹരമായ സത്യം!
ശാസ്ത്രംകൊണ്ടും കവിത എഴുതാനാകുമെന്നും...
ദൈവത്തെ കാണാനാകുമെന്നും ചിത്രകാരന്‍ സാക്ഷ്യപ്പെടുത്തുന്നു.... :) :) :)
(ഈ ചിത്രകാരനു ഭ്രാന്താണുകെട്ടോ!!!... സന്തോഷം സഹിക്കാന്‍ വയ്യാത്ത ഭ്രാന്ത് !)

ബാജി ഓടംവേലി said...

വായിച്ചു വീണ്ടും വായിക്കണം
നന്ദിയുണ്ട്

Pramod.KM said...

സുകുമാരേട്ടാ..നല്ല ഉദ്യമം:)
ഗുരുതരമായ ഒരു തെറ്റ് ചൂണ്ടിക്കാണിക്കട്ടെ.ഇവിടെ ഹൈഡ്രജന്‍ ഒരു ന്യൂട്രോണ്‍ എന്ന് എഴുതിയത് ശരിയല്ല.
ഹൈഡ്രജന്‍ ആറ്റത്തിന്‍ ഒരു പ്രോട്ടോണ്‍ മാത്രമാണുള്ളത്,ന്യൂട്രോണ്‍ ഇല്ല.
ഡ്യൂട്ടീരിയത്തിന്‍ 1 പ്രോട്ടോണ്‍,1 ന്യൂട്രോണ്‍.
ട്രിഷ്യത്തിന്‍ 1 പ്രോട്ടോണ്‍,2 ന്യൂട്രോണ്സ്.
ഇത് തിരുത്തുമല്ലോ:)

Unknown said...

പ്രിയ ചിത്രകാരന്‍ ,
ചെറുപ്പകാലത്തെ ദാരിദ്ര്യം നിമിത്തം തുടര്‍ന്നു പഠിക്കാന്‍ കഴിയാതെ , അക്കാദമിക്കലായി പ്രാഥമിക വിദ്യാഭ്യാസം മാത്രം നേടാന്‍ കഴിഞ്ഞ ഒരു ഹതഭാഗ്യനാണ് ഞാന്‍ . പിന്നീട് പഠിക്കാന്‍ മാത്രമായി ഞാന്‍ അലഞ്ഞു നടന്നിട്ടുണ്ട് . മദ്രാസ് കന്നിമാറ ലൈബ്രറിയില്‍ പോയി രാവിലെ മുതല്‍ വൈകുന്നേരം വരെ ഇരുന്ന് വര്‍ഷങ്ങളോളം വായിച്ചിട്ടുണ്ട് . ഈ പ്രപഞ്ചവും പ്രകൃതിയും എന്ത് എന്തുകൊണ്ട് എന്ന് അറിയാനുള്ള അടങ്ങാത്ത ജിജ്ഞാസ നിമിത്തം . എന്റെ കലാലയ ജീവിതമായിരുന്നു അത്. വിശപ്പ് മാത്രമായിരുന്നു എന്റെ സഹപാഠി . അന്ന് മനസ്സിലാക്കിയ കാര്യങ്ങളാണ് ഒരവസരം കിട്ടിയപ്പോള്‍ ഇന്നെഴുതുന്നത് . ആയിരക്കണക്കിന് ശാസ്ത്രജ്ഞന്മാര്‍ സ്വന്തം ജീവിതം വിസ്മരിച്ചു കൊണ്ട് കണ്ടെത്തിയ ശാസ്ത്ര സത്യങ്ങളില്‍ നിന്ന് ജനങ്ങളും പുതിയ തലമുറയും അകന്നു പോകുന്നത് കാണുമ്പോള്‍ എന്തെന്നില്ലാത്ത ദു:ഖം തോന്നുന്നു. അതാണീ ബ്ലോഗിന്നാധാരം . ഒരായിരം നന്ദിയും സ്നേഹവുമുണ്ട് ; പ്രചോദനം തരുന്ന നല്ല വാക്കുകള്‍ക്ക് !!

പ്രിയ ബാജി നന്ദി .... നന്ദി !!

പ്രിയ പ്രമോദ് ,
തെറ്റ് ചൂണ്ടിക്കാട്ടിയതില്‍ നന്ദി പറയാന്‍ എനിക്ക് വാക്കുകളില്ല . ഞാന്‍ ഒരു തയ്യാറെടുപ്പുമില്ലാതെ ഒറ്റയടിക്ക് ഇരുന്ന് ടൈപ്പ് ചെയ്ത് പബ്ലിഷ് ചെയ്യുകയാണ് . അതുകൊണ്ട് തെറ്റ് പറ്റുക സ്വാഭാവികം . തുടര്‍ന്നും പ്രമോദിന്റെ പരിശോധനം ഞാന്‍ സ്നേഹപൂര്‍വ്വം ആവശ്യപ്പെടുന്നു .

Kaippally said...

:)

മാവേലി കേരളം said...

സുകുമാരന്‍ മാഷേ

ഏറ്റവും വലിയ ധനമാണ് അറിവ്. അറിവുള്ളവന്‍ ധനവാനാണ്. കൂടുതല്‍ എഴുതുക.

Anonymous said...

വളരെ നല്ലൊരു ഉദ്യമം.എന്തു ലളിതമായാണ്‍ താങ്കള്‍ ശാസ്ത്രത്തെ വിശദീകരിക്കുന്നത്!പേരു പോലെ തന്നെ - for the people.പണ്ട് പഠിച്ച് മറന്ന കാര്യങ്ങള്‍ പൊടി തട്ടിയെടുക്കാന്‍ സഹായിച്ചു..വളരെ നന്ദി.കൂടുതല്‍ പ്രതീക്ഷയോടെ...

Dinkan-ഡിങ്കന്‍ said...

സുകുമാരന്‍ ചേട്ടാ
അത്രവല്യ പിടിയില്ലാത്ത വിഷയം ആണ് കെമിസ്റ്റ്രി.
ഇനി ഇതു നോക്കി പഠിക്കാന്‍ ശ്രമിക്കാം പുറകിലെ ബെഞ്ചില്‍ ഒരു സീറ്റ് ഒഴ്ഴിച്ചിട്ടേയ്യ്ക്കൂ
മെന്‍ഡലിയഫ് ആയില്ലെങ്കിലും “മെന്റല്‍“ ആകെനെങ്കിലും ശ്രമിക്കാം :)

Unknown said...

പ്രിയപ്പെട്ട കൈപ്പള്ളീ , ഇവിടെ വന്ന് ഒന്ന് പുഞ്ചിരിച്ച് പോയതില്‍ അളവറ്റ സന്തോഷമുണ്ട്.

ഹൃദ്യമായ വാക്കുകള്‍ക്ക് മാവേലി കേരളത്തോട് കടപ്പാട് ....

സഞ്ജുവിനോട് വാത്സല്യത്തോടൊപ്പം നന്ദിയും !

പ്രിയമുള്ള ഡിങ്കന്‍ ,
പിന്‍‌ബെഞ്ചില്‍ ഇരുന്നാല്‍ ഞാന്‍ പിന്നെ ആരുടെ മുഖത്ത് നോക്കി സംസാരിക്കും? കെമിസ്ട്രി മാത്രമല്ല , ബയോളജിയും ഫിസിക്സും മേത്ത്‌സും ഹിസ്റ്ററിയും എല്ലാം വീണ്ടും പഠിക്കണം. പ്ലീസ് ... ! തുടര്‍പഠനം നമുക്ക് ജീവിതത്തില്‍ വിജയമേ ഉണ്ടാക്കൂ .. ഞാന്‍ എന്റെ സ്വന്തം അനുഭവത്തില്‍ നിന്നാണ് പറയുന്നത്.

Santhosh said...

വളരെ ശ്ലാഘനീയമായ ശ്രമമാണിത്. പാരഗ്രാഫ് തിരിച്ച് എഴുതിയാല്‍ ഉപകാരമായിരുന്നു.

myexperimentsandme said...

നല്ല ശ്രമം.

എന്ത് പഠിക്കുമ്പോഴും എന്തിനാണ് ഇത് പഠിക്കുന്നത്, നിത്യജീവിതത്തില്‍ ഇതിന്റെ ആപ്ലിക്കേഷന്‍ എവിടെയാണ് എന്നൊക്കെ മനസ്സിലാക്കി പഠിച്ചാല്‍ പഠിക്കാന്‍ താല്‍‌പര്യവും വരും, പഠിക്കുന്നത് മനസ്സിലാവുകയും ചെയ്യും.

ഉദാഹരണത്തിന് എന്തിനാണ് നമ്മള്‍ പീരിയോഡിക് ടേബിളിനെപ്പറ്റി പഠിക്കുന്നത്? അത് പഠിക്കുന്നതുകൊണ്ടുള്ള ഗുണമെന്താണ്? എന്നൊക്കെ മനസ്സിലാക്കിക്കാന്‍ പറ്റിയാല്‍... അതില്‍ നിന്നും പീരീയോഡിക് ടേബിളിലെ ഓരോ എലിമന്റിനും നമ്മുടെ നിത്യജീവിതത്തിലുള്ള സ്വാധീനവും, ഓക്സിജന്റെ പ്രാധാന്യവും ഓസോണിന്റെ പ്രാധാന്യവും ഹൈഡ്രജന്റെ പ്രാധാന്യവും ഹൈഡ്രജന്‍ ഫ്യൂവലിന്റെ പ്രാധാന്യവുമൊക്കെയായി പരിസ്ഥിതിയും ആള്‍ട്ടര്‍നേറ്റ് എനര്‍ജിയുമൊക്കെയായി... അപ്പോള്‍ പഠിക്കുന്നവര്‍ കൂടുതല്‍ ചിന്തിക്കുകയും ചെയ്യും.

താങ്കളുടെ ശ്രമങ്ങള്‍ തുടരാന്‍ എല്ലാവിധ ആശംസകളും.

ദേവന്‍ said...

അനുമോദനീയമായ ഉദ്യമം. അറിവിന്റെ പഴങ്ങള്‍ പഥികര്‍ക്കെല്ലാം കൊഴിക്കുന്ന ഒരു വൃക്ഷമായി ഈ ബ്ലോഗ്‌ ഇവിടെ പന്തലിക്കട്ടെ

vimathan said...

സുകുമാരന്‍ മാഷേ, തികച്ചും അവസരോചിതമായി, ഈ ബ്ലൊഗ്. അഭിനന്ദനങള്‍, നന്ദി.

...sijEEsh... said...

njaan Vaayichu .K.P
Enikku Chemitry yum, Physics um pande pattilla..
may be because the way my teachers has taken the class was so boring, And they made me to think that its for only, who wants to become Doctor or Engineer.
Keralathil oru malayalam medium schoolil padichathinteyaaney..

So nammalu athu vittu..
Pakshe njaan ithu vaayikkam tto..
Simple Bashayil K.P ezhuthiyttundu..

Let me start my schooldays :)

mtk said...

വളരെ നന്നായിട്ടുണ്ട് ആവര്ത്തന പട്ടികയുടെ ചരിത്രം ഒന്നു വിശദമാക്കാമൊ

J.Mandumpal Ph.D said...

Sukumarji,

Well written. Those who are interested can go through " the men who made new Physics" written by Barbara Lovett Cline: a good introduction to the non specialists.

Thommy said...

വന്നു, വായിച്ചു, ഇഷ്ടായി
As a Scientist/Chemist myself, I really liked it. Science and Periodic table can not be explained simpler...Great Job

Vp Ahmed said...

താങ്കളുടെ ഉദ്യമം വളരെ പപ്രശംസനീയമാണ്. എന്തുകൊണ്ടാണ് തുടരാതിരിക്കുന്നത് ?

Anonymous said...

സുകുമാരേട്ടാ.....ന്യൂട്രോണിന്റെയും പ്രോട്ടോണിന്റെയും എണ്ണം കൂട്ടിയാൽ അണുഭാരം കിട്ടണ്ടതല്ലേ....Kr ന്റെ കേന്ദ്രത്തില്‍ 36 പ്രോട്ടോണുകളും 48 ന്യൂട്രോണുകളും ഉണ്ട് അപ്പോൾ അവ കൂട്ടി 84 എന്നല്ലെ അണുഭാരം കിട്ടണ്ടത്..പിന്നെ എന്തനു പീരിയോഡിക് ടേബിലിൽ ഒക്കെ 83.80 എന്നു കാണുന്നത്...എന്ത് കൊണ്ടാണ് .20 ന്റെ വ്യത്യാസം..??